करमां री खेती

म्हैं तो

(1)
फण, सूंड, पंजा सा सबळा
गायां सा अबळा
चारपाया का घिसीजणिया
रैवै, आभै हेठै भेळा
पण, म्हैं तो..........

(2)
काळजौ चढ़ावती
कूकां रै बिचाळै
बणतां रैवै, अेक दूजै रा
सिराण-दुपारा।
पण ओळमौ नीं
बदळै री ओळी नीं
पण, म्हैं तो..........

(3)
ऊंचै-ऊंचै दिरखतां
अेक न्यारौ बंगलौ बणाय
भूख, तिरस, गरमी, सरदी अर पीड़
काढै
पाँख्यां, चूंच अर पंजां रै सायरै
पण, म्हैं तो..........

(4)
कळ-कळ बैवणिया झरनां सूं
चिणसाक अळगा
ऊग्योड़ा बिरछ
भुजावां पसार’र
रैवणियां ने खेलावै
बांदरां रौ खेल
पण, म्हैं तो..........