करमां री खेती

ताळौ

(1)
लाय बरसांवतै तावड़ै
जद कोसां ताईं नीं दीसै
ढांढा रौ नांव
इणी बगत
आपरी दीठ बाळतौ
दीस ज्यावै-ताळौ।

(2)
सांसां जमावण वाळै सीयाळै
जद लोथड़ा ताईं धूजै,
गम ज्यावै मिनख,
इणी बगत
सूनै मारग खड़्यौ
दीस ज्यावै-ताळौ।

(3)
हिंयौ हरखावणियै चौमासै
जद बळती बाजै
घाट-घाट हुवै गोठां
इणी बगत भी
कठै नी हालै
खड़्यौ रैवै-ताळौ।

(4)
थनै घड़णियां हाथ
भूलग्या
कियां निभाइजै कौल।
सगळां नै सिखावणनै
सागी ठौड़
ऊभौ रैवै-ताळौ।